Den anochi, un hende hòmber na Boneiru ta haña mordé di kachó. Korps Politie Caribisch Nederland (en adelante: KPCN) ta haña un notifikashon di e insidente di mordé. Dos agente ta bai investigá na e lugá i ta purba haña sa kiko a pasa. A base di deklarashonnan di testigunan ku ta indiká ku ta señora Bakker su kachó ta esun ku a morde, e agentenan ta disidí pa laga dòkter di bestia bini pa pasa e kachó di señora Bakker angua pa e bai sosegá. E señora ta entregá un keho tokante di esaki.
E punto di salida di regulashon lokal na Boneiru ta, ku asina un kachó ta kana lòs riba kaminda públiko sin supervishon, i si no tin opshon pa kue e kachó, polis mag mata e kachó.
Nationale ombudsman ta yega na e konklushon ku KPCN a aktuá muchu lihé na momentu ku nan a disidí laga e kachó pasa angua pa e bai sosegá. No a investigá sufisientemente si tabatin medidanan ménos drástiko ku por a tuma, konsiderando ku e dòkter di bestia por a yega na e lugá i entetrantu a mara e kachó den kurá di kas. Pues no tabatin (mas) peliger agudo ni tampoko tabatin kachó ku tabata kana lòs sin supervishon. P'esei, den e kaso aki no ta asina ku no tabatin opshon pa polis kue e kacho. Irespektivo di e echo si tabatin rekursonan i ekspertiso pa kue i sera kachó, esaki sí tabata duna e agentenan e espasio i tempu pa debidamente konsiderá e interesnan. Por ehèmpel, tumando kontakto ku señora Bakker pa investigá posibel kontra-argumentonan i pa konsiderá medidanan ménos drástiko. Nationale ombudsman ta konsehá KPCN pa elaborá un instrukshon ku ta splika kon agentenan mester aktua den kaso di insidentenan di mordé.
Ademas, Nationale ombudsman ta haña ku KPCN mester a tuma kontakto personalmente ku señora Bakker despues ku el a entregá un keho. I por a splika mas klaramente e desishon ku a tuma tokante di e keho. P'esei, Nationale ombudsman ta rekomendá pa semper tuma kontakto personal na momentu ku un siudadano a entregá un keho, i pa motivá debidamente e reakshon riba kehonan.
