Resientemente, e tim di Nationale ombudsman i Ombudsman pa mucha a tene oranan di konsulta na Hulanda karibense. Un tim di Nationale ombudsman i Ombudsman pa mucha a bishitá Saba i Sint Eustatius. Na Boneiru tabatin un tim di Nationale ombudsman. E oranan di konsulta a wòrdu bon bishitá.
Oranan di konsulta na Saba i Sint Eustatius
E kehonan i señalnan ku e tim di Nationale ombudsman a risibí tabata trata di vários instansianan gubernamental, manera e Entidat Públiko, e Servisio di Impuesto (Belastingdienst), i Kuido i Hubentut Hulanda Karibense (Zorg en Jeugd Caribisch Nederland). E kehonan tabata trata entre otro di e komunikashon di instansianan gubernamental.
E tim di Ombudsman pa mucha prinsipalmente a haña kehonan i preguntanan tokante di enseñansa, manera e kalidat di enseñansa òf enseñansa adekuá pa mucha ku un limitashon. Tambe a ekspresá preokupashonnan tokante di e kalidat di akohida di mucha.
Kòmbersashonnan ku organisashonnan na Saba i Sint Eustatius
Ku e Entidatnan Públiko, e tim di Nationale ombudsman a deliberá tokante di e kehonan pendiente i e progreso den e dosiénan. Ademas, a papia di tópikonan general komo tratamentu di keho, integridat i yudansa di debe.
Den e kòmbersashonnan ku e tim di Ombudsman pa mucha a hiba, a sali na kla ku tin preokupashonnan tokante di e enseñansa i e oferta di yudansa pa mucha ku un limitashon. Tambe tin preokupashonnan tokante di mucha muhénan menor di edat ku tin relashonnan seksual ku hende hòmber adulto. Ademas, pobresa ketubai ta un problema riba e islanan.
Oranan di konsulta na Boneiru
E kehonan i preguntanan ku e tim a risibí na Boneiru frekuentemente tabata trata di e falta di reakshon di e Entidat Públiko Boneiru. Banda di esei, tabata hasi pregunta tokante di e seguro di inkapasidat laboral (arbeidsongeschiktheidsverzekering - AOV). Tambe a papia di e mal funshonamentu di e transporte públiko i e falta di fasilidatnan pa hende grandi. Ta notabel ku e oranan di konsulta ta wòrdu bishitá tur biaha mas frekuentemente pa hende ku ta papia papiamentu i spañó.
Bishita proyektonan Fundashon Krusada na Boneiru
Fundashon Krusada ta un organisashon sosial ku ta ofresé yudansa i apoyo na individuonan i famianan riba diferente área di bida. E tim di Nationale ombudsman a bishitá vários proyektonan di Krusada. Un di nan ta e Greenery, kaminda ta organisá aktividatnan den koperashon ku Justitiële Inrichting Caribisch Nederland. Tambe a bishitá e lugá pa akohida di dia i anochi Walk In i e akohida pa hende muhé Tabitha.
Siguiente bishitanan
Asina nan ta planifiká, lo komuniká e fechanan, oranan i lugánan di e siguiente oranan di konsulta riba nationaleombudsman.nl/hulanda-karibense i kinderombudsman.nl.
