Ombudsman ta rekomendá pa traha un instrukshon di trabou pa aksidentenan den kua tin ún partido só inbolukrá.
Shofùr di un outo di hür a sali heridá for di un aksidente di outo na Boneiru. Den e aksidente no tabatin otro persona envolví. Doño di e kompania ku a verhür e outo, a bai polis pa pidi e prosès verbal. Entre otro e tabata ke sa ken tabata stür i si e persona ei tabata bou di influensha di alkohòl. E tabatin mester di e prueba akí pa su seguro.
Falta di prosès verbal
A manda e doño dj’aki pa’ya algun biaha. Al final a sali na kla ku no tabatin un prosès verbal. Esaki nunka a wòrdu trahá. E doño di e outo tabatin mester di esaki pa e kaso – ku lo a tuma lugá na Hulanda - kontra e hürdó.
Keho
E doño a entregá un keho serka Nationale ombudsman. Ta trata di e echo ku e no a risibí e prosès verbal. Tambe el a keha pasó KPCN no a tèst si e shofùr tabata bou di influensia di alkohòl. E no tabata di akuerdo tampoko ku e manera kon KPCN a trat’é.
Konseho i rekomendashon
Nationale ombudsman ta konkluí ku KPCN no a tuma e doño di e outo na serio. E defensor di pueblo ta haña ku KPCN mester a traha un prosès verbal. Komo ku nan no a hasi esaki, anto tampoko nan a hasi un tèst di alkohòl, ombudsman ta haña ku e doño tabatin ménos prueba pa mustra hues.
Ombudsman ta rekomendá pa traha un instrukshon di trabou pa aksidentenan di tráfiko.
>Riba e página aki bo por lesa e raport na hulandes.