Na novèmber, Nationale Ombudsman a bishitá Boneiru pa, huntu ku Entidat Públiko di Boneiru (OLB), evaluá kon ta bai despues di dies aña di atendementu di keho, i wak padilanti na e añanan ku ta bini. Tambe, el a papia ku diferente instansia riba pobresa, kuido i atendementu di keho di parti di Zorg en Jeugd Caribisch Nederland (ZJCN).
OLB tin dies aña ta atendé keho di e habitantenan di Boneiru tokante gobièrnu. Pero e siudadanonan di Boneiru tin e opshon tambe di aserká Ombudsman direktamente, sin ku nan mester a entregá un keho na OLB promé. Segun Nationale Ombudsman Reinier van Zutphen: ‘Mi por ripará ku OLB ta trahando pa atendementu di keho tuma lugá na un manera adekuá. Tin miembro di personal apuntá spesialmente pa atendé keho i e organisashon ta birando kada bes mas konsiente ku tin hopi ku bo por siña di e kehonan risibí. Tambe mi ta ripará ku kada bes mas tantu siudadano ta hasi uso di nan derecho di entregá un keho, i mi ta kontentu ku esei.’ Den e próksimo dianan, Nationale Ombudsman i OLB lo sigui dialogá riba kalidat di e atendementu di keho i e áreanan kaminda por mehorá esaki. Ademas, na 2023, Ombudsman lo entablá diálogo ku e entidatnan públiko di Sint Eustatius i di Saba tambe riba e tema di atendementu di keho.
Kombatimentu di pobresa
Tambe, Ombudsman a papia ku Unkobon riba e problemátika di pobresa na Hulanda Karibense. Kuarenta porshento di e habitantenan ta biba bou di e liña di pobresa. Ombudsman i Unkobon ta di akuerdo ku mester traha mas tantu i ku mas urgensia riba kombatimentu di pobresa. Den e último añanan, Ombudsman a hasi investigashon ekstenso riba e problemátika di pobresa. E ta monitoriá minusiosamente kon ta duna siguimentu na e rekomendashonnan den e rapòrtnan, i ta trahando riba un vishon tokante kon pa atendé ku e problemátika di pobresa.
Atendementu eksterno di keho pa Zorg en Jeugd Caribisch Nederland
For di 1 di novèmber 2022, ZJCN tin un komishon konsultivo eksterno di keho ku por usa ora un habitante tin keho tokante ZJCN. Ombudsman ta aploudí ku tin un opshon profeshonal i independiente pa atendé keho i, durante su bishita na Boneiru, a papia ku presidente di e komishon, Señor Goedgedrag. Nan a papia entre otro riba un punto di salida ku nan ta kompartí, esta, ku e siudadanonan tin derecho pa nan kehonan wòrdu atendé na un manera independiente i individual, i ku ZJCN por siña for di e kehonan risibí i usa e informashon ei den futuro. Tambe nan a interkambiá riba e echo ku e ròl di Ombudsman no ta kaba unabes ku a yega na un desishon tokante un keho.
Por último, Ombudsman a papia ku ZJCN i un representante di Fundashon Mariadal riba kalidat di kuido na Boneiru, Saba i Sint Eustatius. Nan a interkambiá entre otro riba siere di Bonlab, kontinuidat di kuido i tratamentu di pashènt otro kaminda, pafó di e islanan BES.
