Awe Nationale ombudsman, Kinderombudsman i Veteranen-ombudsman ta presentá nan relato anual 2020 (hulandes) na e Parlamento nobo. Nan ta konstatá ku ainda muchu biaha kos no ta bai bon entre siudadano i gobièrnu. Esei realmente mester kambia, e siudadano meresé mihó. Anto sigur e siudadanonan ku sin yudansa ta pasa trabou pa por partisipá òf asta ta keda marginá. Pensa riba mucha, veterano ku PTSS, hende tiki alfabetisá, hóbennan ku tin mester di kuido kompleho òf empresario ku pa motibu di e krísis di corona tin debenan grandi. Pa e motibu ei e relato anual akí ta un yamada na Parlamento: traha legislashon ku ta simpel i komprendibel.
Reinier van Zutphen: "Gobièrnu tei pa e siudadano i no kontrali. Frekuentemente mi a bisa esei durante e último añanan. Ainda demasiado biaha nos ta mira ku esaki no ta e kaso. Nos ta papia ku mandatario- i ámtenarnan tokante esaki, pero e Parlamento tambe. Si komo Parlamento bo ta responsabel pa e poder di institushonnan, bo mester traha lei i regla ku ta komprendibel i manehabel. Sino bo ta laga e siudadano na kaya, anto tambe e ámtenar den ehekushon. Ku mas frekuensia i ainda promé nos, di nos banda, lo interkambiá pensamentu ku Parlamento tokante nos rekomendashon- i konsehonan.”
Sigui riba e mésun pia no ta un opshon
E periodo binidero lo tin masha reto. Tambe den futuro hopi hende realmente lo tin mester di gobièrnu. Por ehèmpel e empresarionan ku ta hasi uso di e medidanan di apoyo generoso, pero aworó nan mester paga bèk i p’esei nan lo kai den problema. Aserká e problemanan akí manera tabata hasié ántes no ta un opshon. E ora ei gobièrnu mester tei pa nan tambe i mustra kompashon i generosidat. Mester i pór mihó.
Rekuperá konfiansa
Toeslagenaffaire a mustra ku pa motibu di gobièrnu, siudadanonan a kai den problema desastroso. Tin biaha rekonosementu i un man ku ta yuda, ta tarda masha hopi mes. Pa e motibu akí konfiansa di siudadanonan den gobièrnu ta bou di preshon mas i mas. Rekuperashon di esaki ta pidi pa un gobièrnu ku promé ta mustra ku e ta konfiabel. Esei ta kuminsá ku duna siudadanonan konfiansa. Na interes di tur siudadano. Pasó e siudadano meresé mihó.
