‘Regla kontrol!’ Esei ta e título di e di tres relato anual konhunto di Nationale ombudsman, Ombudsman pa mucha i Ombudsman pa veterano. Awe Reinier van Zutphen, Nationale ombudsman, a entregá esaki na Tweede Kamer. E manera kon nos a regla kos ku otro último añanan a bira mashá kompliká. Sigur tambe pa siudadanonan. Mas i mas nan mester hasi i regla kos nan mes. Muchu biaha no ta masha kla unda òf serka ken nan por akudí pa yudansa òf apoyo. Falta kontrol. Ombudsman a boga na Tweede Kamer pa hasi eskoho sabí i kla, pa maneho i ehekushon ku ta prepará i resistente pa futuro. Esei ta sòru pa klaridat, awor i den futuro.
Durante último añanan a implementá desentralisashonnan grandi, ku tabatin komo meta pa trese gobièrnu mas serka di e siudadano. Na aña 2019, Nationale ombudsman, Ombudsman pa mucha i Ombudsman pa veterano a konstatá ku esaki ainda no ta e kaso. Ta parse ku e distansha entre gobièrnu i siudadano a krese na lugá di bira mas chikí. Reinier van Zutphen: “Riba práktikamente tur tereno den kua nos ta aktivo, tabata falta kontrol. Siudadano, pero tambe gobièrnu desentral, ta sinti falta di kontrol òf e espasio pa por tuma kontrol nan mes. Anto na momentu ku munisipionan laga instanshanan (privá) ehekutá e trabou, ta ken ta finalmente responsabel? P’esei hendenan ta haña nan mes ku un gobièrnu ku nan no konosé mas. Esei ta pidi pa un gobièrnu ku ta ‘regla kontrol’.”
Siudadano tin derechi riba un trato korekto
Siudadano tin derechi riba un trato korekto, tambe na momentu ku gobièrnu dal un paso atras. Hustamente e fokus riba aktuashon korekto di gobièrnu, ta hasi ku Nationale ombudsman por aserká i papia ku gobièrnu na momentu ku e perspektiva di siudadano ta na peliger. Den esaki Nationale ombudsman tambe tin un papel na momentu ku servisionan públiko ta wòrdu ehekutá na interes general, dor di tersera parti (privá). Pa sigui yuda hende i pa yama atenshon di gobièrnu. Pa Ombudsman pa mucha e Tratado pa derechonan di mucha ta forma e kompas, i pa Ombudsman pa veterano esaki ta e deber di kuido speshal. Di e manera ei nos ta yuda siudadanonan, veteranonan, mucha- i hóbennan ku ta pega den nan kontakto ku instanshanan (gubernamental).
Mas ku nunka siudadano i polítika ta spera mas di gobièrnu. Regularmente problemanan ta parse di ta masha kompleho i no limitá te ún tema. Ta parse manera ta pidi di mas di gobièrnu ku preguntanan di maneho nobo kada biaha. Pa den futuro tambe por kumpli ku espektativanan i por entregá kalidat, mester hasi eskoho. Hende ke pa gobièrnu mas ku tur kos ta sinsero, simpel i komprensivo. No mas kompliká. Pero ta parse un reflèks pa ora tin preguntanan nobo, prioridatnan òf posibilidatnan tékniko nobo, kosnan bira mas kompliká na lugá di sensio. Anto pa ora ehekushon bira muchu kompliká, pa pidi pa un funshonario pa keho speshal òf un komishon speshal ku mester solushoná e problemanan.
Regla kontrol!
P’esei Nationale ombudsman i Ombudsman pa mucha ta hasi un yamada (ku ta konsistí di kuater parti) na polítiko, mandatario i esnan ku ta ehekutá (uitvoerders):
- Ta sinsero den loke gobièrnu sí i nó ta hasi. Ta transparente tokante e ròl di gobièrnu i esun di e siudadano den situashonnan spesífiko.
- Konfia siudadanonan. Gobièrnu ta fèrwagt kada bes mas di siudadanonan, pero frekuentemente e no ta duna nan e espasio òf konfiansa pa regl’é nan mes. Un eror no intenshoná ta algu ku ta wòrdu kometé lihé. E ora ei gobièrnu t’ei pa yuda, no pa empeorá e problemanan ku straf.
- Pone interes di e mucha na promé lugá durante tur desishon tokante nan bida i enbolbé e mucha den esaki. E pregunta sentral ta: kiko e mucha tin mester anto kon nos ta bai realisá esaki?
- Regla kontrol! Hasi eskohonan sabí i kla, pa asina maneho i ehekushon ta resistente pa futuro. Sòru pa klaridat, awor i den futuro.
Apresio pa e situashon partikular di gobièrnu
E relato akí ta konserní aña 2019. E aña promé ku, di un momentu pa otro, e vírùs di corona a kambia bida rònt mundu. Nos ta apresiá e enorme empeño di Rijksoverheid, munisipionan, profeshonalnan den kuido, servisionan di asistensia, industria i komèrsio i hopi otro na Hulanda i den eksterior ku ta luchando kontra e krísis di corona. Tambe den e situashon speshal akí nos lo keda pidi atenshon pa gruponan di siudadano ku ta haña nan mes den problema manera empresarionan, mucha, hende grandi, boluntarionan den kuido i veteranonan. Ta importante ku medidanan tumá pa gobièrnu na e momentunan akí sali bon pa tur ku tin mester di yudansa.
Reinier van Zutphen, Ombudsman National y Ombudsman pa Veterano, ta splika den e video e puntonan sobresaliente di e relato anual.
