Na Bonèiru un kachó ta logra sali di un kurá i ta morde un persona pasando riba un skuter. Promé ku e doño di e kachó yega kas, polis ta tira e kachó mata i ta hiba e kadaver na e ‘landfill’ (dùmp). E doño ta keha serka Ombudsman Nashonal. Ombudsman Nashonal ta haña ku polis a hasi e skohensia korekto pasobra polis na Bonèiru no tin medio pa gara kachó peligroso.
Na Bonèiru regulashon lokal ta stipulá ku si un kachó ta kana lòs riba kaminda públiko, sin supervishon i no por gara e kachó, polis por tira esaki mata a base di e Ordenansa Insular (Eilandsverordening). Ku e investigashon aki a bin sali na kla ku polis na Bonèiru no ta disponé di sufisiente material i ekspertisio pa gara kachó, ni ta disponé di material adekuá pa por transportá i kuida un kachó (peligroso) unabes a gara esaki.
Den e kaso aki e kachó a heridá un hende un poko promé i tabatin posibel probabilidat di ripitishon. Polis den e situashon aki anto a hasi e skohensia korekto tirando e kachó mata. Ombudsman ta komprondé ku polis, pa motibu di e klima kayente, a hiba e kachó mesora na e landfill.
