Leinan i reglanan eksistente ta duna gobièrnu sufisiente espasio pa yuda siudadanonan adekuadamente. Tòg, den práktika, gobièrnu sa solushoná problemanan ku mas regla, lei i prosesonan kompliká. Miéntras esei no ta yuda pa evitá òf solushoná mayoria di e problemanan di siudadanonan. Ta kambionan den e kondukta di gobièrnu ta benefisiá siudadano, no e echo ku tin hasta mas sistema. Asina Nationale ombudsman, Ombudsman pa mucha i Ombudsman pa veterano ta skibi den nan relato anual tokante di 2023, titulá: ‘Perspektiva di siudadano: un manera di hasi’.
Nationale ombudsman Reinier van Zutphen: "Aña pasá, tabata dura un promedio di 420 dia pa trata un lei den Parlamento. I nos no ta ni konta e tempu di preparashon. Esaki ta tempu balioso pa siudadanonan ku mester di un solushon lihé. Presisamente awor ku ta papia hopi tokante di mehorashon di e relashon entre siudadanonan i gobièrnu, a yega ora pa siudadanonan efektivamente ripará i mira ku tin e mehorashonnan ei.
Nationale ombudsman, Ombudsman pa mucha i Ombudsman pa veterano tei pa yuda siudadano – inkluyendo mucha i veterano – ora algu ta bai robes. Aña pasá, mas ku 22.000 biaha, siudadanonan, muchanan i veteranonan a tuma inisiativa di kontaktá nos. Den e marko aki, e Ombudsmannan a verifiká si e perspektiva di siudadanonan ta e enfoke sentral di instansianan gubernamental, i si ta kumpli ku e derechonan humano i derechonan di mucha.
Kontakto personal
Gobièrnu ta aktuá muchu tiki basá riba e pregunta: kiko ta un manera desente di hasi? Esei, miéntras e kontesta sa ta simpel: kontakto personal i skucha e nesesidatnan di siudadanonan i muchanan. Un di e debernan di gobièrnu ta pa nan mes bai serka e siudadanonan. Pa skucha. I despues hasi loke tin mester.
Gobièrnu tin difikultat pa siña
"Instansianan gubernamental ta hasi uso muchu tiki di e konosementu i eksperensia ku a atkirí den trayektonan di rekuperashon anterior." Esaki a resultá di investigashon di e Ombudsman di situashonnan den kua a perhudiká siudadanonan, i kaminda gobièrnu a duna apoyo den e proseso di rekuperashon. Un ehèmpel ku ta mustra ku gobièrnu tin difikultat pa siña, ta e echo ku hustifikashon i kontrol finansiero sa ta un faktor desisivo den e proseso. Manera den e proseso di rekuperashon di e asuntu di sobrekarga pa akohida di mucha. "Esaki ta pone ku e proseso ta bira pokopoko i kompliká, miéntras siudadanonan ke un solushon kla, simpel i lihé."
Pensa den problemanan en bes di posibilidatnan
“Gobièrnu ta pensa den problemanan en bes di posibilidatnan. Asina e mes ta stroba e kambionan nesesario den su mes servisionan."
Aktuando asina, gobièrnu ta skonde tras di estorbonan ku realmente no ta eksistí. Un ehèmpel ta, ku kontakto ku siudadanonan solamente por tuma lugá pa medio di e kanalnan formal. "Parse ku dunamentu di kontestanan sigun e sistema ta duna gobièrnu mas seguridat ku drenta den kòmbersashon ku siudadanonan di un manera serio, buskando un solushon adekuá."
Un adaptashon nobo, un problema nobo
For di hopi aña, e implementashon di kambionan den sistemanan eksistente ta resultá ku ta un paradòks tóksiko, sigun e Ombudsmannan ta splika. Esei nos ta mira por ehèmpel den kambionan serka jeugdzorg. Kada adaptashon pa solushoná problemanan anterior ta kousa problemanan nobo i adaptashonnan nobo. Entretantu, e problemanan bieu ta sigui eksistí i kuido ta bira mas kompleho i mas karu. Mientrastantu, ainda no ta yuda muchanan i hóbennan di manera adekuá.
Reinier van Zutphen: “Ta urgi awor pa sòru duna siudadanonan i generashonnan futuro di siudadano e konfiansa bèk den gobièrnu. Tin sufisiente posibilidat. I nos sa i nos ta mira ku kambionan práktiko ta yuda. Den nos kòmbersashonnan ku siudadanonan, muchanan i veteranonan, tur biaha nos a siña ku tur kos ta kuminsá ku skucha. Sí ta posibel."
