Kada bes gobièrnu ta bira mas kompleho. Hopi hende ta dal pega. Intermediario, manera dòkter di kas, miembo di konseho munisipal sosial i empleadonan di Het Juridisch Loket, ta yuda i guia e siudadanonan akí. Riba petishon di e intermediarionan Nationale ombudsman a desaroyá un komunidat online. Na e asina yamá Raadbaak nan por kompartí konosementu, kontestá preguntanan práktiko, anto señalá problema. Den otro palabra: kompartí i multipliká konosementu.
Señor Mark Beelo di Het Juridisch Loket tabata un di e promé usuarionan di De Raadbaak. Despues di un preparashon intensivo a lansa esaki riba 8 di mart 2021. “De Raadbaak ta un inisiativa fenomenal. Durante mi trabou na Het Juridisch Loket mi ta ripará mas i mas ku hende tin di aber ku problemátika múltiple. Pues ku kada bes tin mester di mas disiplina pa por yuda nan. No semper mi tin kontesta riba tur pregunta. E ora ei ta bon ku via De Raadbaak bo por konektá rápidamente ku profeshonalnan di otro organisashon ku tin otro ekspertisio. Esei ta evitá ku kada biaha mi mester manda hende bai otro kaminda.”
Efektivo
Tambe señor André van Mierlo, konsehero di konseho munisipal sosial di e organisashon soshal Ons Welzijn na Brabant, ta hasi uso di e plataforma akí for di kuminsamentu. E ta mira ku De Raadbaak ta desaroyando ketu bai: “Ta klaro ku e kontenido di e komunidat mester keda bon optimalisá. Na momentu ku bo hasi un pregunta, esaki mester yega direktamente na e grupo di profeshonalnan korekto. Di e manera ei e plataforma por ta un medio masha efektivo pa kompartí konosementu pa nos por yuda siudadanonan mas lihé.”
Funshon di señal
Banda di esei e ta konstatá ku De Raadbaak no únikamente ta útil pa profeshonalnan rònt Hulanda, pero tambe e por haña un funshon importante di señal pa Nationale ombudsman.
“A medida ku De Raadbaak ta krese i a base di e preguntanan i diskushonnan ku tin den e komunidat, ombudsman ta haña un bon bista di kua problema tin i na unda tin nan. Ta lokal, regional òf nashonal? Ta importante pa ombudsman sa esaki.”
Evitá keho
Den e komunidat Nationale ombudsman su papel ta pa fasilitá, organisá i komuniká. Na nòmber di ombudsman señor Frans Weekamp ta manehá e proyekto: “E tarea núkleo di ombudsman ta pa asistí e siudadano ora e ta bati na nos porta ku un keho tokante un instansha gubernamental. Pero preferibelmente nos ke evitá ku e problema di e siudadano ku gobièrnu ta bira un keho. Pa medio di De Raakbaak profeshonalnan por kontestá preguntanan di siudadanonan mas lihé i di e manera ei evitá ku problema ta eskalá i ku mester akudí na Nationale ombudsman.”
Tantu Beelo komo Van Mierlo ta partidario di ampliashon di e plataforma akí. “Lo ta bon si pa medio di De Raadbaak nos lo tin kontakto lihé ku organisashonnan nashonal manera Belastingdienst, UWV òf DUO. Esakinan ta órganonan di gobernashon kaminda ku regularmente nos ta topa un muraya burokrátiko.”
Djòin!
Ta importante pa e aña akí De Raadbaak sigui krese. E plataforma lo ta mas efektivo na momentu ku tin mas partisipante. Mark Beelo ta bisa: “Unda na e momentu akí bo por hasi un pregunta i haña kontesta di asina hopi banda? E posibilidat ei simplemente no ta eksistí. Den e sentido ei, De Raadbaak a bira un plataforma úniko. Esei ta fantástiko tòg?”
Pues si abo ta un profeshonal i bo gusta kompartí bo konosementu i yuda otronan, djòin e komunidat di, pa i dor di profeshonalnan huntu ku Nationale ombudsman. Huntu nos ta fuerte i nos ta yuda e siudadanonan ku ta den pèrtá!