Hóbennan di Hulandes Karibense ku ta lanta den pobresa hopi bia ta kai den un sírkulo visioso di problema. Pa kibra esaki, un enfoke urgente integral di pobresa bou di e hóbennan aki ta nesesario.
Esaki Nationale ombudsman i Ombudsman pa mucha ta rekomendá den e rapòrt konhunto ‘Ta relevante unda bo kuna a para'. For di e investigashon, ku ta dirigí riba pobresa bou di hóbennan di Hulandes Karibense, ta sali ku hopi hóben ta eksperensiá opstákulo serio ku ta stroba nan di sali for di pobresa. Esaki ta hasi e transishon pa bira adulto difísil.
Kaminda hóbennan Hulandes Oropeo den pobresa por konta ku diferente fasilidat protektor, esakinan ta falta hopi bia pa hóbennan di Hulandes Karibense. E pobresa ta hasi doló i ta pidi intervenshon pronto.
Sírkulo visioso di pobresa
Margrite Kalverboer, Ombudsvrouw pa mucha: ‘Hóbennan ku lanta den pobresa hopi bia no ta eksperensiá un problema so, sino un skala di problema riba diferente tereno. Nan ta haña nan den un patronchi di ripitishon ku ta sigui di generashon pa generashon. Ta importante pa kibra esaki..’
Komo konsekuensha di pobresa, e hóbennan aki hopi bia tin falta di kuminda salú. Banda di esaki e strès, ku e bida den pobresa ta trese, por kondusí na e echo ku mayornan ta ménos kapabel pa kria nan yunan bon. E riesgo riba violensia doméstiko i maltrato di mucha ta bira mas grandi. I esei por kondusí na problema mental. Mas aleu pobresa tin un impakto riba e oportunidatnan di desaroyo pa hóben, pasobra pobresa ta kompañá pa bibienda mas malu i ménos partisipashon na aktividatnan sosial. Pobresa hopi bia ke men ku e muchanan ta kuminsá skol ku un atraso kaba, loke ta pone nan kore un riesgo mas grandi di kita skol sin diploma. Asina ta bira mas difísil pa haña un trabou ku sufisiente entrada. E atrasonan ku e hóbennan ta haña den diferente área kasi nan no por alkansá mas. E konsekuensha di esaki hopi bia ta ku, ora nan mes haña yu, nan ta pasa e pobresa i e falta di oportunidat pa e siguiente generashon.
Enfoke integral urgente
No opstante e medidanan ku a tuma pa kombatí pobresa na Hulanda Karibense, ta keda prekupashon kontinuo pa hóben ku ta lanta den pobresa. E enfoke no ta resultá di ta fásil, pa motibu di e diferente terenonan kaminda e problemátika ta tuma lugá. P’esei un koperashon urgente i intensivo entre Gobièrnu di Reino i e entidatnan públiko ta nesesario.
Reinier van Zutphen, Nationale ombudsman: ‘E seriedat di e problemátika di pobresa ta pidi un intervenshon pronto. Kolaborando integralmente, riba término kòrtiku mester tuma paso den e kombatimentu di pobresa. Mester kibra e sírkulo visioso di pobresa pa asina hóbennan di Hulanda Karibense haña e oportunidat di sali for di pobresa.’
Tambe tur dos ombudsman ta enfatisá ku den e enfoke integral mester tene kuenta ku e konteksto lokal, e kultura di e islanan i e falta di konfiansa eksistente den gobièrnu. Ademas, nan ta haña importante pa skucha e hóbennan i laganan pensa huntu tokante solushon.
Magrite Kalverboer: ‘Ora bo duna hóben un bos, e chèns ku medidanan i programanan ku ta intenshoná pa nan logra di bèrdè mes, ta oumentá.’
Kuater punto klave
Kolaborashon entre Gobièrnu di Reino i e entidatnan públiko ta krusial pa yega na un solushon. Riba diferente tereno, manera entrada, enseñansa i akohida despues di skol, ta tuma medida ku riba término largu ta mehorá e situashon pa hóbennan den pobresa. Pero e seriedat di e problemátika ta pidi urgensia tambe. P’esei e ombudsmannan ta insistí pa riba término kòrtiku kolaborashon i sintonisashon tuma lugá. Den esaki nan ta mira un papel di direkshon pa ministerio di BZK i ta rekomendá pa dirigí riba kuater punto:
- Bibienda i akohida: riba término kòrtiku mester bini sufisiente posibilidat di akohida pa hóbennan vulnerabel i den sentido amplio mester traha na e realisashon di bibienda pagabel.
- Oportunidat di edukashon i aktividat: mester bini mas oportunidat pa edukashon i aktividat despues di skol ku ta stimulá, i ademas ta fásil i pagabel.
- Enseñansa profeshonal i lugá di stazje i di eksperensia di trabou: mester krea sufisiente lugá di stazje i di eksperensia di trabou i alabes mester realisá enseñansa profeshonal mas al kaso.
- Buddy òf persona di konfiansa: hóbennan mester haña akseso na un buddy òf persona di konfiansa ku nan por papia kuné òf ku por sostené nan den kaso di problema.
Informashon di fondo
For di 2010 Boneiru, Saba i Sint Eustatius ta munisipio ekstraordinario di Hulanda. Huntu nan ta forma Hulanda Karibense. Nationale ombudsman for di e tempu ei ta trata keho di instanshanan di Gobièrnu di Reino na e islanan. For di 2012 e ta trata keho tambe di instansha di gobièrnu lokal, o sea e entidatnan públiko. E Ombudsman pa mucha, for di su establesimentu na 2011, tin e outorisashon di trata keho na Hulanda Karibense.
E investigashon konhunto akí, di Nationale ombudsman i Ombudsman pa mucha, di pobresa bou di adulto hóben na Hulanda Karibense, ta e di dos den un seri di tres investigashon di Nationale ombudsman pa loke ta trata e problemátika di pobresa na Hulanda Karibense. Na sèptèmber 2019, Nationale ombudsman a publiká un investigashon di pobresa bou di hende grandi di edat na Boneiru, Sint Eustatius i Saba. Den e di tres investigashon, pobresa bou di mayornan soltero ta para sentral.
