> Dit rapport is ook beschikbaar in het Nederlands
> This report is also available in English
Hóbennan di Hulanda Karibense ku ta lanta den pobresa hopi bia ta resultá den un sírkulo visioso di problema. Pa kibra esaki, un enfoke integral urgente di pobresa bou di e hóbennan aki ta nesesario.
Esaki Nationale ombudsman i Ombudsman pa mucha ta rekomendá den e rapòrt konhunto ‘Ta relevante unda bo kuna a para’. For di e investigashon, ku ta dirigí na pobresa bou di hóbennan di Hulanda Karibense, ta sali ku hopi hóben ta eksperensiá opstákulo serio ku ta stroba nan di sali for di pobresa. Esaki ta hasi e transishon pa madures difísil.
Margrite Kalverboer, Ombudsvrouw pa mucha: ‘Hóbennan ku lanta den pobresa hopi bia no ta eksperensiá un problema so, sino un skala di problema riba diferente tereno. Nan ta haña nan den un patronchi di ripitishon ku ta sigui di generashon pa generashon. Ta importante pa kibra esaki.’
Reinier van Zutphen, Nationale ombudsman: ‘E seriedat di e problemátika di pobresa ta pidi un intervenshon pronto. Kolaborando integralmente, riba término kòrtiku mester tuma paso den e kombatimentu di pobresa. Mester kibra e sírkulo visioso di pobresa pa asina hóbennan di Hulanda Karibense haña e oportunidat di sali for di pobresa.’
