Imforme despues di e kòmbersashon di mesa rondó
Riba djárason 8 di desèmber último, Nationale ombudsman a papia ku kasi 40 representante di organisashonnan di enseñansa i gobièrnu, studiante i guia tokante kon ta bayendo despues ku a publiká e rapòrt 'Dolor di kabes di studiante karibense'. Resultado di e kòmbersashonnan akí lo wòrdu presentá den un rapòrt preliminar ku lo sali den zomer. Den esaki lo hasi menshon di e akshonnan tumá i e puntonan ku ainda mester traha riba nan.
Mihó koperashon entre e ministerionan i organisashonnan konserniente despues di e rapòrt di Nationale ombudsman
Nationale ombudsman ta konstatá ku e partidonan involukrá a kuminsá traha huntu di manera konstruktivo, anto ku a pone e promé pasonan den un bon direkshon. Loke tambe ta positivo ta e boluntat pa sigui koperá.
Pero alabes a sali na kla ku e studiantenan karibense ainda ta konfrontá muchu problema práktiko. Ainda ta sinti falta di un organisashon ku tin bista riba tur loke ta sosodiendo. Masha importante ta ku no ta lubidá e studiantenan di mbo. Mayoria di nan ta bini Hulanda sin guia. No tin nada organisá pa nan, anto nan ta mas yòn ku e studiantenan ku ta bin pa studia na hbo òf universidat.
Kompromiso di Nationale ombudsman
A pidi e defensor di pueblo pa keda involukrá. Reakshon di señor Reinier van Zutphen, Nationale ombudsman, riba esaki tabata ku realmente ainda ta muchu tempran pa e no ta involukrá mas. Otro aña e lo bolbe organisá un kantidat di kòmbersashon di mesa rondó. E lo bolbe invitá e partidonan pa esakinan.
Rapòrt 'Dolor di kabes di studiante karibense'
Riba 16 di desèmber 2020 Nationale ombudsman a terminá su investigashon tokante e problemanan ku studiantenan di parti karibense di reino tin na momentu ku nan bai (òf a) studia na Hulanda. Den e rapòrt a konstatá ku pa diferente motibu studiantenan karibense ta pega durante nan estudio na Hulanda. Pa e motibu akí nan tin retraso den nan estudio òf asta nan ta stòp promé ku tempu. Den e rapòrt akí ombudsman a pidi gobièrnu, i en espesial minister di OCW, sekretario di estado di BZK na Hulanda i nan koleganan na e islanan, pa hasi tur loke ta den nan alkanse pa hasi studiamentu na Hulanda pa e studiantenan akí, mas sensio ku ta posibel.