Nationale ombudsman den akshon pa studiantenan karibense

Kada aña mas o ménos 1.600 studiante di e parti karibense di Rèino ta kuminsá ku masha entusiasmo na nan estudio na Hulanda. Tòg hopi di nan no ta kaba nan estudio. Nationale ombudsman a pone e problema akí riba mapa. El a investigá ta kua ta e problemanan ku e studiantenan karibense tin, anto el a bin ku konseho pa e organisashonnan (gubernamental). Kiko a hasi ku eseinan? Anto kua ta e puntonan di akshon ku ainda mester haña kontinuashon? E rekonstrukshon akí ta trata tokante esei.

Pakiko un investigashon na studiantenan karibense?

“Esaki ta algu ku bo sa hasi mas biaha… sirbi hende blanku. Esaki realmente ta algu pa bo.”

Ta esaki e studiante karibense Tays ta haña tende ora ku (banda di su estudio) e ta traha den hóreka na Amsterdam. Tays no por kere su orea. El a tende bon? Realmente su kolega a bis’é esaki?

Kumulashon di problema

Tays ta di Boneiru. Loke e ta pasa aden, no ta un eksepshon. Hopi studiante karibense ku ta studia na Hulanda tin di aber ku rasismo.

Anto rasismo no ta e úniko problema ku nan tin di dil kuné. Un atraso lingwístiko, diferensha di kultura, tiki guia di estudio, leinan i reglanan kompliká: e lista ta largu.

Zorgtoeslag: mi tin derecho riba dje sí òf nò? Of bo tin derecho riba esei únikamente ora bo ta traha mientras ku bo ta studia? En todo kaso ta difísil pa komprondé kiko ta kiko ku tantu diferente tipo di toeslag – Siddharta (24)

E konsekuensha? Hopi studiante karibense tin retraso den nan estudio òf no ta kaba nan estudio na Hulanda. Anto esei ta sòru pa debe di estudio haltu i/òf keho síkiko.

Keda pusha

Ya pa basta tempu e señalnan akí ta drenta tiki tiki serka Nationale ombudsman. Nan ta bini di studiantenan mes, pero tambe di organisashonnan manera Kompas For Students. Deon Bisslik i Viviana Lopez Paz ta traha ei. E fundashon akí ta empeñá pa guia studiantenan karibense na Hulanda i pa nan preparashon for di e islanan.  

Deon: “Na mei 2017 kaba nos a trese e problemanan di studiantenan na atenshon di gobièrnu i ministerionan. Pero ta sumamente difísil pa haña solushonnan struktural riba e nivel ei. Bo mester keda pusha.”

Un investigashon

Komo ku nada ta kambia, na aña 2020 Nationale ombudsman mes ta kuminsá ku un investigashon. E ke sa: ta kua problema esaktamente e studiantenan karibense ta topa? Anto kua di e organisashonnan involukrá por solushoná e problemanan ei?

Maneho i esnan impliká

Un tim di investigashon ta kuminsá traha. Annemarie Tuzgöl, lider di e proyekto: “Tin un gran kantidat di partido involukrá den e tema akí. Nos a trese nan huntu pa asina nos por haña un bista kompleto di tur e problemanan ku tin.”

Pa e motibu ei, e investigadónan ta inisiá diferente akshon:

• Pa medio di diferente kanal ta repartí un lista di pregunta bou di e studiantenan karibense ku ta òf a studia na Hulanda. Un total di 624 studiante a yena e lista akí.
   
• Ta tene kòmbersashon den grupo di studiantenan karibense.
   
• E investigadónan di Nationale ombudsman ta entrevistá studiantenan di hbo i un dosente individualmente.
   
• Tambe e investigadónan ta papia ku kolaboradónan di e ministerionan, instanshanan i organisashonnan impliká. Por pensa aki na ministerio di Enseñansa, Kultura i Siensia, Dienst Uitvoering Onderwijs (DUO), Sociale Verzekeringsbank (SVB), Rijksdienst voor Identiteitsgegevens (RvIG), Arubahuis, Zorgverzekeringslijn, Kences, Stichting DUWO, SSH Student Housing, WeConnect, Vereniging Levende Talen Papiaments, HvAnti, Stichting Studiefinanciering Curaçao (SSC), TuranGoeloe, Unified St. Maarten Connection (USC) i fundashon Kompas For Students.
   
• Banda di esei e investigadónan ta partisipá na diferente webinair i ta studia diferente dokumento di maneho, dokumento di Parlamento i rapòrt.

Kòmbersashon di mesa rondó

Na novèmber 2020 Nationale ombudsman ta kulminá e investigashon ku dos kòmbersashon di mesa rondó. E organisashonnan (di studiante), instanshanan (gubernamental) i e defensornan di pueblo involukrá ta papia tokante e resultadonan di mas importante. E tim di investigashon ta prosesá e kòmbersashonnan ei den un rapòrt ku ta wòrdu presentá fin di 2020. Tambe ta tradusí e rapòrt akí na ingles i papiamentu.

Problema promé, durante i despues di e estudio

Den e rapòrt Nationale ombudsman ta deskribí e problemanan di mas importante ku studiantenan karibense tin:

1. Kasi sin guia

Studiantenan karibense práktikamente no ta haña guia na momentu di skohe un estudio. Pa e motibu ei nan ta haña un bista ménos bon di loke e estudio esaktamente ta enserá. E konsekuensha ta ku un kantidat relativamente grandi di studiante karibense ta kambia estudio den e promé mitar aña di nan estudio.

Na e islanan bo ta haña informashon di dekanonan ku tin trinta pa kuarenta aña sin bai Hulanda (…) Ta ora bo a yega Hulanda i bo a kuminsá studia, ta e ora ei numa bo por bishitá dianan habrí. Anto hopi biaha bo ta bin ripará ku bo a skohe e estudio robes – Viviana (29)

2. Sin Burgerservicenummer (BSN)

Studiantenan karibense no tin Burgerservicenummer (BSN) ora nan yega Hulanda. Nan ta haña esaki numa ora nan inskribí na Basisregistratie Personen (BRP). Pa por registrá aki bo mester tin adrès di bo bibienda. Pero pa motibu di e skarsedat di bibienda ku tin, ta masha difísil pa haña un kamber di studiante.  

Anto sin BSN studiantenan no por habri un kuenta na banko ni sera seguro. No ta tur studiante karibense ta realisá nan mes esaki delantá.

Tabata difísil pa haña e BSN ya komo mi tabata serka famia pero mi no por a inskribí na nan adrès. Komo mi no a hasi petishon pa BSN, mi no por a regla otro kos manera DigiD òf kuenta di banko – anónimo

3. Leinan i reglanan deskonosí

Hopi biaha studiantenan karibense no konosé e leinan i reglanan hulandes. Nan no sa esaktamente ki derecho i obligashon nan tin rondó di toeslagen òf impuestonan. Òf nan no sa di e opshon pa pidi eksonerashon. Tambe ta asina ku e studiantenan no tin derecho riba un seguro básiko di kuido hulandes. Pa e motibu ei nan no ta bini na remarke pa zorgtoeslag.

Nan a bisa mi ku mi por a haña eksonerashon pa impuesto di munisipio i di ‘waterschap’. Na momentu di regla e eksonerashon e munisipio di Den Haag a bisa mi ku mi mester hasi petishon pa zorgtoeslag, pasó sino mi no ta bini na remarke pa eksonerashon (…) Despues di mas o ménos dos aña, mi a risibí un karta di Belastingdienst bisando ku mi mester paga e zorgtoeslag bèk, ya komo ku mi no tabatin derecho riba dje. – anónimo

4. Shòk kultural

Studiantenan karibense mester kustumbrá enormemente na e kultura i sosiedat hulandes. Nan tin un atraso lingwístiko i tin diferenshanan kultural grandi. Banda di leinan i reglanan deskonosí, nan tin di aber ku diskriminashon. Esaki ta sòru pa retraso den estudio i problemanan síkiko.  

Hopi biaha kostudiante no sa ni e diferensha entre Aruba ku Boneiru. Nan ta kere  tur hende ta bin di Kòrsou. Anto esei ke men ku bo ta floho, kriminal, bo no ta yega na tempu i bo no ta kumpli ku afsprak. – Karman (24)

5. Debe di estudio

Hopi studiante karibense ta akumulá debe (di estudio) masha haltu. Frekuentemente nan ta sera un fiansa di estudio lokal, banda di nan fiansa di DUO, pa por lora finansieramente. Pa falta di trabou, ta difísil pa nan pa paga e debe(nan). Tambe ta asina ku e montante ku nan mester paga hopi biaha ta mas haltu ku nan kapasidat finansiero.

Kon bin esaki ta asina? Salario na e islanan ta mas abou, aya tin otro sistema di impuesto, anto e kosto di bida ta haltu na e islanan. Esaki ta impedí hopi èks studiante pa bai nan isla bèk.  

Bai Aruba bèk lo ta un suisidio finansiero. Naturalmente mi tin un debe di estudio. Si mi bai Aruba i paga esaki bèk aya, mi lo ta perhudikando mi mes. Sueldo mínimo na Aruba ta €856,46. Na Hulanda esei ta €1680,- – Deon (31)

6. Posishon apart

E posishon apart di e studiantenan karibense ta sòru pa problema. Algun areglo ta konsiderá studiantenan karibense komo studiante internashonal, mientras ku otro areglo ta konsiderá nan komo studiante ‘normal’. Frekuentemente esaki ta den desbentaha di e studiantenan.

Na Hulanda tin organisashon pa refugiado, hende grandi, hende malu, asina mi por sigui menshoná. Lástimamente, pa nos no tin un lokèt. – Milena (24)

Problema na kuadrat

Problema manera skarsedat den merkado di bibienda òf debe haltu ta konta pa tur studiante na Hulanda. Pero pa studiantenan karibense e problemanan akí por kousa problema na kuadrat.

Nan ta sinti nan mes marginá, na skol i den komunidat. Huntu ku e atraso lingwístiko i e diferenshanan kultural, tur esaki ta kousa problemanan sosio-kultural i síkiko. Anto esaki ta kousa retraso den nan estudio òf asta nan ta stòp di studia. E studiantenan ta sinti falta di apoyo i guia. Tin biaha nan ta sinti nan mes komo siudadano di segunda kategoria.

Alabes instanshanan gubernamental i institutonan edukashonal hustamente ta pensa ku e studiantenan karibense ta outosufisiente. Pero Nationale ombudsman ta konstatá ku esaki ta un ilushon. E ta haña ku gobièrnu mester sòru pa tur su siudadanonan. Tambe pa e grupo di studiantenan akí. Pasó nan ta leu for di ta siudadano di segunda kategoria.

E rekomendashonnan di mas importante

Nationale ombudsman ta haña ku e paisnan i instanshanan di tur dos banda di oséano mester traha mas huntu i di mihó manera. Pa e motibu ei su rekomendashonnan di mas importante ta:

1. Sòru pa e studiantenan karibense haña un pakete integral ku informashon den e fase di preparashon. Na e momentu akí muchu biaha e informashon ta fragmentá.
    
2. Sòru pa e studiantenan karibense tin un BSN promé ku nan yega Hulanda. Di e manera ei nan por regla asuntunan práktiko delantá.
    
3. Ofresé studiantenan karibense akseso na seguro di kuido básiko hulandes i ku esei, derecho riba zorgtoeslag.
    
4. Duna studiantenan informashon tokante (eksonerashon) di impuesto i toeslagen durante nan estadia na Hulanda.
    
5. Sòru pa akseso na guia sikológiko. Konta studiantenan karibense tokante e posibilidatnan for di kuminsamentu i guia nan di manera proaktivo.
    
6. Posibilitá pago integral di debenan di estudio. Na e momento akí sí ta involukrá e debenan lokal di èks studiante di Boneiru, Sint-Eustatius i Saba ora ta kalkulá loke mester paga DUO bèk. Pero no ta hasi esei ku debenan lokal di èks studiantenan di Kòrsou, Aruba i Sint-Maarten.  
    
7. Sòru pa outomatisashon den midimentu di kapasidat finansiero ora studiantenan bai e islanan bèk. Aworaki studiantenan ku bai Karibe bèk mester hasi un petishon na DUO pa por laga kalkulá e montante ku mester paga bèk di nan debe di estudio. Mester ta posibel pa por hasi esaki di manera outomátiko.  

Reakshon riba e rapòrt

E rapòrt ta wòrdu publiká na desèmber 2020. Den e mésun luna ei diferente parlamentario ta hasi pregunta (Kamervragen) na minister Van Engelshoven, ku na e momentu ei tabata minister di Enseñansa, Kultura i Siensia.. Tambe durante e Vierlandenoverleg e ta trata e rapòrt ku e ministernan di enseñansa di Aruba, Kòrsou i Sint-Maarten. E ministernan ta rekonosé e problemanan i nan ke traha huntu riba esaki.

“E tim di Nationale ombudsman a paga bon tinu ora nos tabata kòmbersá”, Deon Bisslik di fundashon Kompas for Students ta bisa. “Hopi di loke nos a konta, a bini bèk den e rapòrt. Porfin e problema real a sali na kla.”

Skolnan superior i universidatnan den akshon

Durante e Vierlandenoverleg e kuater ministernan di enseñansa a disidí pa aseptá e oferta di skolnan superior hulandes ku ta kolaborá huntu. E skolnan akí a proponé pa forma un ‘Regiegroep’. E grupo akí mester desaroyá un plan di akshon pa konektá e sistemanan edukashonal na Hulanda i e islanan mihó na otro.

Ron Bormans, presidente di e Regiegroep: “Lo ta bon si nos por ta presente i involukrá den e fase final di enseñansa na e islanan. Di e manera ei nos por traha, entre otro, na e parti di dominio di idioma i nos por diskutí profundamente tokante eskoho di estudio.”

Reakshon di e minister

Na yüli 2021 èks minister Van Engelshoven den un karta ta anunsiá ku e kuater ministernan di enseñansa ta aseptá e propuesta di e Regiegroep. El a pidi e inisiadornan pa elaborá e propuestanan pa mehora.

Tambe e ta enfatisá ku e studiantenan karibense mester ta prepará optimalmente pa nan binida na Hulanda. Ya komo ku e studiante karibense regularmente mester skohe pa bai studia leu for di kas, mirando ku simplemente e no por hasi e estudio ei serka di kas.

P’esei e ke kuminsá traha riba e siguiente puntonan:

• Huntu ku e ministernan di enseñansa di Aruba, Kòrsou i Sint-Maarten e ke investigá kon nan por drecha e dominio di idioma di e studiantenan.
   
• Ku tempu mester implementá BSN na Hulanda Karibense. E sekretario di estado di Asuntunan Interno i Relashonnan den Rèino (BZK) ta trahando riba esei.
   
• Mester haña un lugá pa por duna informashon tokante eksonerashon di debe.
   
• Habitantenan di e partinan karibense di Rèino mester por hasi uso di e seguro básiko hulandes durante e periodo ku nan ta studia na Hulanda. P’esei e ministerionan di Salubridat, Bienestar i Deporte (VWS) i Asuntunan Sosial i Empleo (SZW) ta trahando riba un kambio di lei.
   
• Tambe señora Van Engelshoven ke investigá kon por stimulá e studiantenan karibense pa nan skohe e guia i apoyo (síkiko) eksistente.  
   
• Ta bini un grupo di trabou finansiamentu di estudio ku mester solushoná e problemanan ku tin ku pagamentu di debe di estudio bèk.

Na di dos parti di aña 2021 e Regiegroep lo bini ku rekomendashonnan kon pa mehorá akohida i guia di studiantenan karibense, señora Van Engelshoven ta bisa den su karta na yüli 2021. Fin di aña 2021 e ke traha afsprak ku e ministernan di enseñansa di Aruba, Kòrsou i Sint-Maarten tokante kon lo sigui ku e aserkamentu. E ta fèrwagt ku e aserkamentu lo tin efekto den e aña studiantil 2022-2023.

Señor Robbert Dijkgraaf ku ta e minister nobo di Enseñansa, Kultura i Siensia, resientemente a informá parlamento ku tur studiante ku lo bin studia na Hulanda, lo haña un Burgerservicenummer (BSN). Ku esaki e ta atendé e moshon ku a wòrdu presentá riba 17 di febrüari 2021 durante un debate den Parlamento. E debate ei tabata trata tokante e opstákulonan burokrátiko ku tin un efekto negativo riba resultadonan di studiante di e parti karibense di Rèino.  

Ombudsman ta sigui

Huntu ku otro organisashonnan Nationale ombudsman a logra pone e problemanan bon riba mapa. Van Engelshoven i e otro ministernan di enseñansa ta konsiente di e gravedat di e situashon.

Entretantu ombudsman ta papia ku e minister di edukashon di Sint-Maarten i tambe ku e defensornan di pueblo di Sint-Maarten i Kòrsou tokante e problemanan. Banda di esei e ta aklará e rapòrt na e komishon parlamentario fiho di Asuntunan di Rèino i na e komishon parlamentario fiho di Enseñansa.

Na 2021 kolaboradornan di Nationale ombudsman ta papia ku e organisashonnan, ministerionan i stakeholders involukrá. Tambe tin deliberashon di forma struktural ku Vereniging Levende Talen Papiaments, Arubahuis, Curaçaohuis i Sint Maartenhuis.

Deon Bisslik di fundashon Kompas For Students: “Mi ta masha kontentu ku e empeño di Nationale ombudsman. Ta danki na dje awor tin un rapòrt i medionan di komunikashon ta pone atenshon na e problemanan di e studiantenan karibense. Ombudsman ta sigui dal bai i ta sòru pa hende tene nan atenshon riba e tópiko.”

Pero despues di un aña ku a saka e rapòrt e rekomendashonnan a wòrdu siguí? Anto e studiantenan karibense ta ripará algu di esei kaba?

Pa haña kontesta riba e preguntanan akí, 8 di desèmber 2021 Nationale ombudsman ta organisá dos reunion di mesa rondó ku stakeholders, èks studiante, ministerionan envolví i e defensornan di pueblo di e islanan.

Mehoranan i puntonan di atenshon

Resultado di e reunionnan di mesa rondó ta kla. A tuma paso den bon direkshon pa solushoná e problemanan di e studiantenan karibense. Pero ainda tin un kaminda pa kana.  

Kua e desaroyonan di mas importante ta?

1. Mihó preparashon pa loke ta trata studiamentu na Hulanda

Na kuminsamentu di 2022 e Regiegroep lo bini ku un plan pa un trayekto pa drecha konekshon di enseñansa. Mester bin ku un programa di apoyo kompleto pa studiantenan karibense. Tambe mester bin un lista ku tur partido involukrá. Pa kulminá mester duna informashon pa studiantenan karibense di manera mas efektivo na studiante i demas partidonan involukrá.   

Organisashonnan den akshon

Banda di esei un kantidat di organisashon involukrá tabata aktivo. Por ehèmpel TuranGoeloe, ku ta un organisashon ku ta guia studiantenan estranhero na Hulanda, a kuminsá un kampaña di konsientisashon pa studiantenan na e islanan. Tambe na desèmber 2021 Stichting Studiefinanciering Curaçao (SSC) a manda un propuesta pa Aruba i Sint-Maarten pa informá hóbennan ku ta kabando skol sekundario mihó tokante nan posibel futuro na Hulanda.    

Vereniging Levende Talen Papiaments ta guia studiantenan karibense aktivamente. Tambe

fundashon Kompas For Students ta traha duru. Tur aña nan ta duna tayer na Aruba pa prepará studiantenan mas mihó ku ta posibel pa nan estadia na Hulanda. Ta trata di informashon práktiko tokante transporte públiko te tep tokante areglonan finansiero.

2. Kambio di lei rondó di BSN

Entretantu ministerio di BZK ta trahando riba un kambio di lei. Meta di esaki ta pa alfinal por introdusí BSN na Hulanda Karibense.

E kambio di lei akí ta relevante únikamente pa studiante di Boneiru, Sint-Eustatius i Saba. Pa e motibu ei banda di esaki, ministerio ta investigá kon studiantenan di Aruba, Kòrsou i Sint-Maarten tambe por haña un BSN.

3. Kambio di lei rondó di seguro di kuido

Ministerio di VWS, huntu ku ministerio di SZW, ta traha riba un di dos kambio di lei. Nan ta investigá te na ki punto studiantenan ku no tin akseso na seguro di salú hulandes por bini na remarke pa esaki tòg. Probablemente lo realisá e ahuste di lei na yüli 2022. P’esei nan tambe ta trahando riba un areglo transitorio.

4. Areglonan rondó di pago di debe di estudio

DUO a traha afsprak ku fisko di Hulanda Karibense i Kòrsou. Pa e añanan despues di e promé petishon di kapasidat finansiero, proaktivamente nan ta puntra pa e entrada di e studiantenan. E studiantenan no ta hasi petishon? E ora ei nan ta haña un rekordatorio pa hasi petishon di un kalkulashon di nan kapasidat finansiero.

Banda di esei DUO di forma proaktivo ta duna informashon na e islanan tokante pago di debe. Tambe SSC ta konsehá studiantenan pa fia ménos sèn ku ta posibel pa asina evitá debe haltu.

Nationale ombudsman ta haña ku den futuro, na momentu ku ta determiná e kapasidat finansiero, DUO mester tene kuenta ku e situashon di bida real di hende na e paisnan. Pero ainda no ta asina leu. Promé lo bini un grupo di trabou Finansiamentu di Estudio, ku partisipante di e kuater paisnan. E grupo akí ta enfoká riba dunamentu di informashon i simplifikashon di regulashon.  

Kiko awor?

Pues tin diferente punto di mehora ku a wòrdu inisiá. Pa promé biaha tin un bon asosiashon integral formá dor di e Regiegroep, pa konhuntamente traha riba e problemanan di enseñansa. Nationale ombudsman ta mashá positivo tokante esaki.

Sinembargo ainda tambe tin punto di atenshon. Deon di fundashon Kompas For Students ta sinti falta di akshonnan konkreto. “E diferente partidonan involukrá tin hopi idea”, e ta bisa. “Pero den e aña ku a pasa nada no a drecha realmente pa e studiantenan. Mi lo ke mira ku gobièrnu realmente lo koperá awor sí. Gobièrnu mester pone sèn i espasio disponibel pa por implementá e solushonnan.”

Proseso lentu

Lider di proyekto Annemarie sa ku banda di esei kambio di legislashon i regulashon ta kosta hopi tempu. “Legislashon hulandes ta kompleho. Tin hopi kos ta relashoná ku otro. Pero mi lo ke mira ku ministerionan ta tuma kontròl, pa asina nos rekomendashonnan realmente wòrdu siguí.”

Ademas algun di e organisashonnan ku ta involukrá ta wòri tokante e kambionan den legislashon. Esakinan ta prinsipalmente dirigí riba studiantenan di Boneiru, Sint-Eustatius i Saba. Ku esaki tin peliger ku studiantenan di Aruba, Sint-Maarten i Kòrsou lo haña otro trato. Tambe tur regulashon ku studiante tin di aber kuné, ta keda kompleho. Anto e problema di bibienda no ta solushoná asínasina.

Konfia den un bon resultado

A pesar di tur kos Deon di fundashon Kompas For Students ta konfia den un bon resultado. “E studiantenan mes ta duna mi speransa. Studiantenan ku un sonrisa riba nan kara ta konta ku nan a hal nan diploma. Ku nan a biba na Hulanda, ku nan a siña hopi tokante nan mes i nan a sigui desaroyá. Esei ta e kos di mas importante. Ta p’esei mi ta keda empeñá tur dia.”

Annemarie: “Ta bon kla ku ainda ta muchu tempran pa laga bai. P’esei Nationale ombudsman ta keda monitòr e situashon rondó di studiantenan karibense.”

Feedback

Fin di 2022 Nationale ombudsman lo bolbe organisá un reunion di mesa rondó. E ora ei e ke tende kiko definitivamente a kambia pa studiantenan. Tambe e tin plan pa publiká un informe (intermedio) den zomer di 2022.

Annemarie: “Nos ta fèrwagt ku den 2022 lo tin kosnan ku a drecha. A investigá e problemanan klaramente i tur hende sa ta kua nan ta. Awor ta akshon mester tin.”

Deon ta di akuerdo. “Awor nos tin un gobièrnu nobo. Esei ta ofresé oportunidat nobo.”

Resúmen

Último añanan Nationale ombudsman a investigá e problemanan ku studiantenan karibense tin na Hulanda. Rasismo, atraso lingwístiko, diferensha kultural, tiki guia pa ku estudio, leinan i reglanan kompliká: e lista ta largu. Pa e motibu ei Nationale ombudsman a bin ku rekomendashonnan kon organisashonnan (gubernamental) por drecha e situashon di studiantenan karibense.

Danki na su esfuerso, e problemanan ta haña atenshon na Hulanda anto na kada isla. Tambe a inisiá e promé puntonan di akshon. Ministerionan hulandes ta preparando kambionan den lei, pa asina den futuro, studiantenan karibense por tin un BSN na tempu i pa nan por tin akseso na seguro di kuido básiko hulandes.

Tambe un asina yamá Regiegroep ta preparando un trayekto pa drecha konekshon entre enseñansa karibense i hulandes. Banda di esei organisashonnan involukrá ta traha riba mihó informashon tokante studia i biba na Hulanda. Anto tokante debe di estudio.

Alabes tin hopi kos pa hasi ainda. Ahuste di lei ta kosta tempu. Tambe tin problema ku no por solushoná asínasina manera falta di bibienda.

P’esei den e aña binidero Nationale ombudsman ta keda monitòr kiko ta hasi ku su rekomendashonnan. Fin di 2022 atrobe e lo organisá un reunion di mesa rondó ku tur e organisashonnan i ministerionan involukrá. E ora ei e ke tende kiko a drecha definitivamente pa e studiantenan karibense na Hulanda.

> Dit artikel is ook beschikbaar in het Nederlands
> This article is also available in English