Alsa maneho di keho dor di gobièrnu na un nivel mas haltu

Yuda personanan ku tin un keho di e manera korekto. Esei ta parti di bon servisio. Pero ta kon ta hasi esei? Nationale ombudsman ta duna outoridatnan hèrmènt práktiko pa por profeshonalisá nan maneho di keho. Banda di esei e ta organisá tayer grátis tambe.

Ora ku ombudsman a ripará ku instanshanan gubernamental ku mas frekuensha ta bati na su porta ku e pregunta ta kon nan mester manehá sierto keho el a skirbi ‘Ombudsvisie op professionele klachtbehandeling’. Na 2018 e ‘Vishon di e defensor di pueblo pa kon manehá keho di manera profeshonal’ akí, a keda skirbí den koperashon estrecho ku esnan ku ta manehá keho na gobièrnu.

Tuma siudadano na serio

Aki den tin pará kiko esnan ku ta manehá keho tin mester komo un bon base. Pensa por ehèmpel riba konosementu i abilidat, pero tambe riba aseptabilidat i un kultura habrí den kua esnan ku ta duna guia, ta hunga un ròl importante. E punto di salida sentral di Ombusvisie ta ku mester tuma kada señal di malkontentu di siudadanonan na serio, anto ku mester garantisá e persektiva di e siudadano semper.  

Mas importante ku sistema

E manera kon ta komuniká ta un opstákulo importante den maneho di keho interno na organisashonnan gubernamental. Hopi siudadano ta haña gobièrnu distante i formalista. Frekuentemente ta reakshoná riba keho bisando ‘Asina e ta den nos sistema, pues asina ta’. Ombudsman ta yama atenshon di gobièrnu riba esaki. E ta enfatisá ku kontakto personal entre siudadano i gobièrnu mester keda eksistí. Sistema no por ta - ni bira - mas importante ku hende.  

Tayer

Eva Roest ta e lider di proyekto di maneho di keho profeshonal. E ta splika di ki manera Ombudsman ta yuda organisashonnan gubernamental. “Ta mas ku klaro ku nos ta tèst maneho profeshonal di organisashonnan gubernamental pa medio di nos investigashonnan i  nos ta publiká un rapòrt. Den esaki nos ta hasi rekomendashon konkreto pa mehorá maneho di keho, basá riba nos Ombudsvisie. Banda di esei tin organisashon gubernamental ku ta tuma inisiativa i pidi nos pa mehorá nan maneho di keho. Nos ta yuda nan entre otro pa medio di tayer.  

Mehorashon

Señora Eva Roest ta mira ku organisashonnan gubernamental den práktika, realmente ta hasi algu ku e konsehonan di Ombudsvisie i Nationale ombudsman. Komo ehèmpel di un di e instanshanan gubernamental e ta menshoná Landelijk Bureau Inning Onderhoudsbijdragen (LBIO). Na LBIO maneho di keho realmente a mehorá.

LBIO ta sòru pa e alimentashon pa mucha òf partner ku hues a stipulá, realmente yega kaminda e mester yega den kaso ku esaki no bai di mes. Den kasonan asina e ofisina akí tin di aber ku èks partnernan ku tin un relashon mutuo gravemente perturbá.

Manera tur organisashon, LBIO tambe ta risibí keho. Señora Eva Roest ta bisa: “Ya pa un periodo largu, nos tabata haña señal ku e maneho di keho di LBIO lo por mihó. Anto ta pa e motibu ei na 2019 nos a kuminsá nos propio investigashon. Nos a pone maneho di keho di LBIO na prueba di nos vishon riba maneho di keho profeshonal pa e periodo di 2015 te ku 2019.”

Ombudsman a konkluí ku na LBIO lo mester bin hende pa manehá keho ku ta distanshá di e proseso primario. Banda di esei el a mira posibilidat pa mehorá e registrashon i evaluashon di keho. E komunikashon ku e siudadano tambe por tabata mas simpel i neutral.

Dil ku malkontentu

Den e rapòrt ‘Van omgaan met onvrede naar leren van klachten’ e Nationale ombudsman a duna seis rekomendashon ku kual LBIO lo por sigui mehorá nan maneho di keho. Señora Roest ta konta: “LBIO a duna di konosé ku e ta bai sigui kasi tur rekomendashon di nos rapòrt, anto ku nan ta bai profeshonalisá nan maneho di keho. Entretantu por ehèmpel LBIO a drecha notabelmente e kalidat di e manera ku ta manehá kartanan di keho.”